محبت کا گیت

ہر ساز پہ گایا جاتا ہوں

وجدان میں پایاجاتاہوں

ہرطورسنایا جاتاہوں

        میں گیت ہوں پیار محبت کا

        میں گیت ہوں پیار محبت کا

محتاج نہیں ہوں سازوں کا

فنکاروں کا، آوازوں کا

ہوں واقف دل کے رازوں کا

        میں طالب ہوں کب شہرت کا

        میں گیت ہوں پیار محبت کا

سب قدر مری پہچانتے ہیں

سب قیمت میری جانتے ہیں

سب میری عظمت جانتے ہیں

        ہے اوج پہ تارا قسمت کا

        میں گیت ہوں پیار محبت کا

مجھے پنچھی بن میں گاتے ہیں

جھرنے طنبور بجائے ہیں

مجھے مانجھی پاس بٹھاتے ہیں

        میں نغمہ ہوں اِک وحدت کا

        میں گیت ہوں پیار محبت کا

بچھڑوں کو ملانا میں جانوں

روٹھوں کو منانا میں جانوں

روتوں کو ہنسانا میں جانوں

        میں چاہنے والا الفت کا

        میں گیت ہوں پیار محبت کا

جذبوں کو زباں دیتا ہوں میں

ہر دل کی دعا لیتا ہوں میں

بے حرف صدا دیتاہوں میں

        اعجاز ہے میری قدرت کا

        میں گیت ہوں پیار محبت کا

میں رنگ میں ہوں  خوشبو میں ہوں

میں قُمری کی کُو کُو میں ہوں

ہر جا ہر سمت ہر سو میں ہوں

        ہے چرچا میری عظمت کا

        میں گیت ہوں پیار محبت کا

میں گُل میں ہو گلدان میں ہوں

میں کھیت میں ہوں کھلیان میں ہوں

میں دیپک کی ہر تان میں ہوں

        یہ راز ہے میری  عزت کا

        میں گیت ہوں پیار محبت کا

مخلص وجدانی، مظفرآباد، آزاد کشمیر